Բարի օր՝ այսօր, այստեղ ես կպատմեմ «Մուտքի» ճամբարի երկրորդ փուլի մասին, որը եղավ Արատեսում օգոստոսի 24-ից 26:
Առաջին օրը, առավոտ շուտ՝ մեկնեցինք Սուրբ Երրորդություն եկեղեցու բակից։ Ինձ շատ էր դուր եկել ճանապարհին պատուհանից նայելը և ուրիշներին լսելը։ Իմ ավտոբուսը շատ աշխույժ էր, և հենց այդպիսի տրամադրությամբ մենք ունեցանք մեր կանգառը Արտաբույնք գյուղում, իսկ հետո՝ վերելքը դեպի Սմբատաբերդի բարձունք։ Իհարկե, ճանապարհը շատ դժվար կարող էր լինել շատերի համար, շոգ էր, մեզ փրկում էին միայն աղբյուրերը, բայց մեկ է՝ հախթահարելով մեր առաջին բարձունքը՝ ամեն ինչ մոռացանք։
Հաջորդ կանգառը հենց մեր տնակներն էին, մենք տեղավորվեցինք, և սկսեցինք ճաշ պատրաստել։ Ես դրան շատ էի օգնում և շատ ուրախ էի, որ այդ ամենը մենք էինք անում։
Հետո եղավ պարուսուցում Մերի Խաչիկյանի կողմից, և ինձ շատ դուր եկավ, ինչպես մենք մտերմացանք այդ ժամանակ։ Նաև մտերմացանք խարույկի մոտ՝ բարբառային զրույցների ժամանակ։
Այդպես և անցավ առաջին օրը։
Հաջորդ օրը սկսեցին նախավարժանքից, որը մեզ թարմացրեց։ Այդ օրը ես շատ շփվեցի մարդկանց հետ, նաև օգնում էի ամեն ինչով։ Նաև, ես ականատես եղա նրան, ինչպես մի նկարիչ նկարեց մեր ճամբարի ակումբը և դրա կողքի բնությունը։ Ասեմ, որ դա շատ թերապեվտիկ էր
Նորից պարելուց հետո՝ եղավ քայլք դեպի Հյուսիս, այնուհետև վերադարձ ձորակով դեպի Արատեսի վանք, Խաչոց ձոր և ժայռի աղբյուր, լող Արատես գետի գյոլերում։ Իհարկե, թրջված էինք վերադարձին, բայց շատ երջանիկ և հետաքրքրված։
Օրը վերջացրինք խարույկի շուրջը խոսելիս։
Վերջին օրը, իհարկե, ամեն ձև փորձում էի օգնել հավաքվելուն, տարածքը կարգի բերելուն։ Ճիշտն ասած, չէի ուզում գնալ, բայց մեկ է, երբ բոլոր իրերը հավաքված էին և բոլոր ափսեները դասավորված էին՝ շարժվեցինք դեպի տուն, բայց կանգառներով՝ շատ բան տեսանք։
Այսպիսին էր մեր ծրագիրը՝
-Եղեգիս՝ քայլք դեպի Զորաց վանք
-Վարդենյաց լեռնանց՝ Քարավանատուն
-Ներքին Գետաշեն՝ Կոթի եկեղեցի, Խաչքարերի բլուր
-բրդուճային ընդմիջում Գետաշենում
-Նորատուսի խաչքարեր
-Հայրավանք։
Ամեն ինչ շատ հետաքրքիր էր, ինձ շատ դուր եկավ, որ մենք պատմությունը այդպես ուսումնասիրեցինք, նոր տեղեկություններ իմացանք, և ամենակարևորը ՝ մեր աչքով տեսանք։
Այդպես՝ վերադարձանք տուն…
Անկեղծ ասած, իսկապես չէի ուզում գնալ այդտեղից։ Չնայած, որ ես Արատեսում եղել էի, ինձ հետաքրքիր էր այնպես, ինչպես կլիներ, եթե առաջին անգամ այստեղ լինեի։
Նաև, սա ձեռքբերումների ճամբար էր ՝ այս անգամ ես շատ ակտիվ էի թէ՜ շփվելուց, թե՜ օգնելուց, անում էի իմ կարողությունների մաքսիմումը։ Ինձ շատ դուր եկավ այստեղի մթնոլորտը, մտերմությունը, ձեռք բերեցի նոր փորձ և նոր հիասքանչ ընկերներ։
Անհամբեր սպասում եմ մյուս անգամին…